Lakri ko ghun aur
mashrae ko buraiyaan kha jateen hain. Mashrati buraiyoon ko is qadar faroogh
hasil hochuka hai k na sirf zati zindagi na sirf humari qoomi aur ijtemaee
zindagi bhi ajeeran hoker rehgae hai. Agar kaha jae k burayoon nay humein nahn
gheera balky humnay khud hi burayoon ko apny upper hawi kerliya hai tou ghalat
na hoga kyo k buraiyan khud hi nahn ajatein humari apni kotahi, sussti aur deen
se bezari ki wajha se paida hoti hai. Hum maghribiyaat k junoon main apna app
bhula baithy hain. Humnay apni salahiyatoon aur iqdaar ko kheerbaad kehdiya hai
aur humari zindagi ka sabse zayada afsoosnak aur khatarnaaq pehlu yahi hai
jisnay pury mashray ko apni lapeet main le rakha hai. Madi iqdaar ki yalghaar
nay humaray mashray main humdardi, jazba-e-eisaar, akhoowat, rehm dili aur
insaaf jasy riwaeeti jazbaat-o-ahsasaat ko kamzoor ker dala hai. Humari muqadas
majlisi aur tehzeebi riwayaat barah-e-raast in buraiyoon se mutasir hochuki
hain. Har meedan aur har shoba-e-karobaar main khud gharzi aur zati munafqat
parasti nay usool parasti aur qaumi mufaad ki jagha leli hai. Itehaad aur
itefaaq k bajae tafreeq-o-munafqaat faroogh parahi hai. Ilaqae aur lisani
taasub nay humari mili wehdaat ko khatam ker dala hai.har shakhs pareeshan aur
muztarib nazar ata hai.
Is hum geer kharabi ki
asal wajha yeh hai k humnay apnu rasool Hazrat Muhmmad Mustafa (P.B.U.H) k
farmaan ko bhula ker shetaniyaat ko apna liya hai. Jab humary dil main yeh
tasaver hi baqi nahn raha k humnay ek din khuda k samny peesh hoker jawab deh
hona hai tou khoof kis cheez ka hai. Bas humary mad-e-nazar tou duniya ki
shaan-o-shoukat aur aeesh-o-araam hai. Mashrati taqazoon ka shaur hum main raha
hi nahn, ye qaoom ki sabse bari badkismati hai k awaam ki aksaaryat mashrati
masaeel k hal k liye na kabhi sochti hai aur na qar-e-khair main hisa leenay k
liye kisi ki hosala afzaee kerti hai. Yoon lagta hai k unhein apni hi khud
gharziyaan se hi fursaat nahin. Wo qoumi aur mili masaeel k liye kyon demagh
kharab karein. Wo tou sirf yeh janty hain k humnay apna falan kaam kistarha
nikalna hai. Chahe yeh masla rishwat se hal hota ho ya kisi ka haq marnay se
inka matlab nikalta ho agar kisi ko qatal kerny se inhen faeeda pohanchta hai
tou wo isey bhi dereegh nahin kerty. Jab is qadar behisi aur lataluqi paida
hojae tou ijtemae mufadaat ki kaun pasbani kerta hai? Ijtemae mufadaat k liye
baaz auqaat zati mufadaat ko bhi qurbaan kerna perta hai magar jazba-e-esaar o
qurbaani aur humdardi hi mafqood hojae tou kya hosaqta hai aur sari qaoom apni
buraiyoon se nalaaan bhi hai aur phir in per amaal pera bhi hai. Inhein pata
bhi hai k yeh buraee hai magar burae se bach ker bhi nahn chalty.
Ahsas-e-zemedaari jo
har ghalat se ghalat insaan ko bhi durust rah per leata hai. Lekin yahan tou ulta
hi mamla hai humaray ander ahsas-e-zimedari bilkul nahn raha. Jab humein ahsaas
hi nahn k hum per kya faraeez aeed hotay hain aur humein kistarha insey ahda
bara hona hai tou asay main islah ka tasavur bemaeenay hoker reh jata hai .
Humari qumi zindagi ka
ek bara almiyaan ye bhi hai k hum munafqat se kaam lety hain. Humary
qool-o-fail main tazaad hai. Humaray dil main kuch hota hai aur zuban per kuch
aur. Is tarha qumi masaeel haal nahn hua kerty balky ulajh ker reh jatay hain
jis k nateejay main humein faeeday k bajae nuksaan hota hai. Hum main yeh nuks
bhi hai k hum batein tou bht kerty hain magar amli taur per bikul sifaar hotay
hain. Huma dusroon ko tou nasehateein kerty hain magar kabhi apna ahtesaab nahn
kerty. Agar har fard apni apni jagha per durust sochy aur durust kaam kary tou
isey sari qaum theek hojati hai kyo k afraad k majmooe hi se qaumeen banti
hain.
AQSA IQBAL
No comments:
Post a Comment